mejemjetanje

zarjadowanja/Veranstaltungen > 2025

To bě mejemjetanje

Po wjace hač 30 lětach je Komorowska Hutowska młodźina zaso meju stajiła a dnja 16. meje 2025 na swjedźeń mejemjetanja na sportnišću přeprosyła. Tydźenje dołho běchu młodostni zarjadowanje přihotowali a reje nazwučowali.

Něhdźe 100 ludźi z Komorowa a wokoliny, mjez nimi mnozy Serbja a wjesnjanosta Swen Nowotny, jich přeprošenju slědowaše a wobhlada sej jara rjany program. Wosom porow pokaza šěsć serbskich rejow. Holcy běchu so serbsku katolsku drastu woblekli. Mejski kral bu Anton Wićaz, kiž wuzwoli sej Helene Franke za swoju kralownu. Županka župy Budyšin Leńka Thomasowa, kiž so tohorunja wobdźěli, chwaleše dobru organizaciju a rjany program. Skupina Přezpólni cyłe zarjadowanje ze swojimi spěwami wobrubi a hudźbu z cejdejki zesylni.

Domowinska skupina bě přihoty podpěrała a Katja Liznarjec a Raphaela Wićazowa běštej holcam při hotowanju drastow pomhałoj.

Text: Borbora Felberowa

Fota: Hutowa Jugend e. V.
Leńka Thomasowa
Alenka Hagerowa