Zarjadowanja skupiny
zarjadowanja/Veranstaltungen > 2025
Rozprawa wo skupinskej zhromadźiznje
Dnja 10. měrca zetka so wosom wot jědnaće čłonow našeje Domowinskeje skupiny w
Komorowskim młodźinskim klubje k našej lětnej zhromadźiznje. To běchu Barbara, Angelika,
Anka, Alenka, Hella, Günter a Borbora. Aurela je nowa čłonka, njemóžeše pak so buhužel
wobdźělić.Alenka zhromadźiznju nawjedowaše a poda rozprawu wo našej lońšej dźěławosći kaž tež
financnu rozprawu. Předewzaća noweho lěta předstaji Borbora. Rozprawje a plan so
schwalichu.Skupinske předsydstwo bě so dnja 11. februara zešło a namjety zdźěłało. Město pućowanja
po šćežce sydom kralow na horje Lubin blisko Budestec rozsudźichmy so za wopyt
Radworskeho dwórnišća a drastoweho fundusa.
Borbora rozprawješe wo rozmołwje, kotruž wjedźeštaj Günter a wona dnja 20. februara z
wjesnjanostu hłownje wo financowanju serbskich projektow w gmejnje. Gmejna zapłaći lětsa
zaso podruž za naše skupinske zarjadowanja kaž tež informacisku taflu wo serbskich
wosobinach w Komorowje, kiž ma so lětsa dozhotowić. Dalša wulka pozicija je mejemjetanje,
kotrež Hutowska młodźina za 16. meju přihotuje. Za to chcedźa sej katolsku narodnu drastu
wupožćić a serbske reje nazwučować. Domowinska skupina to jara wita a podpěra.
Z dobrej bjesadu zhromadźizna wuklinča.
Přednošk wo nałožkach
Wosebiteho hosća witachmy dnja 22. apryla w Komorowskim młodźinskim klubje:
Dr. Susanne Hozyna přednošowaše nam wo zymskich nałožkach: “Umzug, Feuer,
Erbsstrohbär. Bräuche zwischen Weihnachten und Walpurgis kulturgeschichtlich erklärt”. Za wšěch 17 přitomnych bě to přewšo zajimawe, wšako móže wona pozadki tutych tradicijow jara derje rozkłasć. Přednošk bě w němskej rěči, tola na serbske prašenja dr. Hozyna tež serbsce wotmołwi. Zwjeselace tež bě, zo wobdźělichu so tohorunja třo młodostni kaž tež wjesnjanosta.
Informacia wo serbskich wosobinach
Dalšu informacisku taflu maja nětko w Komorowje pola Rakec w chěžce při Krabatowym
kolesowarskim pućiku. Wona wobsahuje krótke žiwjenske daty wo šěsć w Komorowje rodźenych
serbskich wosobinach w serbskej a němskej rěči . To su Herman Bjenada, Michał Domaška, Hanka
Fascyna, Jurij Šewčik, Herman Šudak a Herman Wuhler. Wobsah je Domowinska skupina Komorow –
Trupin – Rakecy přihotowała, wosebje čłonka skupinskeho předsydstwa Alenka Hagerowa, kiž
přisłuša tohorunja Rakečanskemu stawizniskemu towarstwu RAK. Gmejna Rakecy je zhotowjenje
platy zapłaćiła a wjesnjan Christian Paulick je ju přičinił.
